El Principáu destina 46 millones a convertir Asturies nuna "potencia turística" en 2025

Los fondos pa Retu Demográficu medrarán hasta los 3,8 millones

El Gobiernu d’Asturies reforzará en 2025 la inversión en turismu, que xubirá un 13,7 por cientu al respective de 2024, hasta los 46,1 millones d’euros, col envís de convertir Asturies nuna potencia nel sector, con especial atención a la so vertiente rural, asina como a la desestacionalización y descentralización.

Asina lo dixo esti miércoles la vicepresidenta y conseyera de Presidencia, Retu Demográficu, Igualdá y Turismu, Gimena Llamedo, na presentación de los presupuestos del so departamentu pa 2025, que medren a los 217,7 millones d’euros, lo que supón una medría del 6,55 por cientu al respective d’esti añu.

Nel apartáu de turismu, el Principáu espera siguir la sienda de medría en temporada baxa, que dexó nel primer semestre una xubida de visitantes del 23,7 por cientu al respective de cifres prepandemia, asina como afitar el turismu en temporada alta y medrar la llegada de turistes estranxeros.

Pa cumplir estos oxetivos llanzaránse campañes de promoción por valor de 5,7 millones d’euros, de los que tres millones dirán destinaos a publicitar Asturies nel ámbitu nacional, 2,5 millones a nivel internacional y 215.000 euros pa la promoción interna.